Muntakhib -- Adhoori Nazm

GuL-e-Tasbeeh · Jun 5th, 2009, 07:38 pm

Izhaar-e-Tishna
Mujhey Uss Shkhas sey itni Muhabbat hey
k jaesey seep ko baarish ki booNdoN sey
k jaesey Chaand ko Sooraj ki kirnoN sey
k jaesey TitliyoN ko Phool ki rangat lubhaati hey
k jaesey jugnuoN ko raat aanchal meiN sajaati hey
k jaesey mouj saahil k liye pal pal tarasti hey
k jaesey phool ki khushboo hawaa k dil meiN basti hey
k jaesey Khushk sehraa abr ko dil sey bulaata hey
k jaesey bhaTka raahi manziloN ki aor jaata hey
k jaesey raat ki raani ko raateiN shaad karti heiN
k jaesey shabnami bosoN ko kaliyaan yaad karti heiN
k jaesey khaab aur aankhoN ka rishta hey aTal aesey
k jaesey jheel ki baaNhoN meiN khilta hey Kanwal aesey
k jitney lafz likhey heiN muhabbat ki kitaaboN meiN
k jitney rung hotey heiN bahaaroN meiN GulaaboN meiN
k neeley aasmaaN par jis qadar roshan sitaarey heiN
k jitney iss zameeN par chaahatoN k ist'aarey heiN
k jaesey mout k bistar pe kuch pal saans ki chaahat
k jaesey lams-e-Issa sey miley beemaar ko raahat
k jaesey ghum k maaroN sey ho ik ghum-khwaar ka rishta
k jaesey qaid-e-tanhaai sey ho deewaar ka rishtaa
k jaesey baaNsuri ki Lay pe saanseiN geet banti heiN
k jaesey wasl rut meiN dhaRkaneiN sangeet banti heiN
k jaesey bulbuleiN phooloN ki rut meiN gungunaati heiN
k jaesey chowdhweeN k chaand ko lehreiN bulaati heiN
sabhi kuch kah diyaa phir bhi hey dil meiN an-kahi baaqi
rahii izhaar k lafzoN ki yuN tashnagi baaqi
muhabbat k samandar k kinaarey ho nahiN saktey
merey jazboN ke qaabil is'taarey ho nahi saktey

Khaamoshii~ · Jun 8th, 2009, 07:19 am

wahh kya baat hai

Ali_ · Jun 14th, 2009, 04:52 pm

nice